ललितपुर । शहरी विकासमन्त्री सीता गुरुङले संघीय लोकतान्त्रिक गणतन्त्र सफल बनाउने जिम्मेवारी सबैको साझा जिम्मेवारी भएकाले सबैले भूमिका निर्वाह गर्न आवश्यक रहेको बताउनुभएको छ ।

आदिबासी जनजाति उत्थान राष्ट्रिय प्रतिष्ठानको २३ औं स्थापना दिवसको अवसरमा आज यहाँ आयोजित कार्यक्रममा उहाँले सो कुरा बताउनुभएको हो । आदिबासी जनजातिको अधिकार पनि यही व्यवस्थामा सुनिश्चित हुने उहाँको भनाइ छ ।

नेपालको विविधताभित्र आदिबासी जनजातिको पृथक पहिचान रहेकाले त्यसको संरक्षण गर्ने जिम्मेवारी सबैको भएको चर्चा गर्नुभयो । नेपालको समावेशी लोकतन्त्र विश्वको लोकतन्त्रभन्दा भिन्नै रहेकाले यसको सही व्यवस्थापनमा सरकारले ध्यान दिनुपर्ने उहाँले बताउनुभयो ।

कुल जनसंख्याको ३८ प्रतिशत जनजातिको कला, संस्कृति र पहिचानको प्रवर्धन गर्न आवश्यक रहेकाले सरकार त्यसमा जिम्मेवार बन्नुपर्ने उहाँले सुझाव दिनुभयो । जनजाति प्रतिष्ठान र आदिबासी आयोगका प्रकृति फरक भएको र दुवैको महत्व रहेकाले त्यसबारेमा सरकारलाई बुझाउन आवश्यक रहेको चर्चा गर्नुभयो । प्रतिष्ठान जनजातिको प्रतिष्ठानको विषय भएकाले यसको बजेट सिलिङ बृद्धि गरी काम गर्ने वातावरण बनाउनुपर्ने उहाँले चर्चा गर्नुभयो ।

प्रतिष्ठानका उपाध्यक्ष गोकुल घर्ती मगरले आदिबासी जनजातिको पहिचान कला संस्कृति रहेकाले त्यसको संरक्षण गर्न नसके पहिचान समाप्त हुने बताउनुभयो । आदिबासीको पहिचान बचेमात्र देशको विविधता पनि कायम रहने चर्चा गर्नुहुँदै उपाध्यक्ष घर्तीले सबैलाई त्यसमा लाग्न आग्रह गर्नुभयो ।

कार्यक्रममा आदिबासी जनजाति महासंघका अध्यक्ष ग्याल्जे शेर्पा, थारु आयोगका अध्यक्ष विष्णुप्रसाद चौधरी, प्रतिष्ठानका सदस्य विष्णुकुमारी चौधरी, आदिबासी जनजाति आयोगका सदस्य डा. मिन श्रीस, प्रतिष्ठानका कमल राजवंशीलगाायतले शुभकामना मन्तव्य व्यक्त गर्नुभयो । सो अवसरमा विभिन्न जातिका नृत्य समेत प्रस्तुत गरिएको थियो ।