कठमाडौं । आईसीसी विश्वकप क्रिकेट लिग–२ त्रिकोणात्मक अन्तर्गत नेदरल्याण्ड्सलाई ९ विकेटले हराउँदै नेपालले सानदार जित हासिल गरेकाे छ ।

शनिबार भएको त्रिवी क्रिकेट मैदानमा नेपालले खेलको सुरुवातदेखि नै उत्कृष्ट प्रदर्शन गर्दै लिगको दोस्रो खेलमा नेपालले नेदरल्याण्ड्समाथि ९ विकेटको फराकिलो अन्तरले जित हासिल गरेको हो । टस हारेर पहिला ब्याटिङको निम्तो पाएको नेदरल्याण्ड्सले ३९औँ ओभरमा सबै विकेट गुमाउँदै १३७ रनमा समेटिएको थियो ।

नेदरल्याण्डस्लाई कम स्कोरमा समेट्ने क्रममा नेपालका कुशल भुर्तेलले ४ विकेट लिए । ललित राजवंशीले २ विकेट लिए । सोमपाल कामी र रोहित पौडेलले समान १ विकेट आफ्नो नाममा गरे । कुशलले ७ ओभरमा मात्र २० रन दिदा ४ विकेट लिए । कुशलले ३९औँ ओभरको अन्तिम बलमा भिभियन किंग्मालाई २ रनमा पेभेलियनको बाटो देखाउँदै नेदरल्याण्ड्सलाई अलआउट गरे ।

३५औँ ओभरको दोस्रो बलमा कप्तान स्कट इवार्ड ३३ रन बनाउँदा कुशल भुर्तेलको बलमा एलबीडब्लु धरापमा परे । उनले नै ३३औँ ओभरको अन्तिम बलमा आर्यन दत्तलाई १० रनमा भिम सार्कीको हातबाट क्याच आउट गराए ।

रोहितले २८औँ ओभरको दोस्रो बलमा सारिज अहमदलाई १ रनमा बोल्ड आउट गराए । कुशलले २७ ओभरको तेस्रो बलमा वेस्ली बेरिसलाई शून्यमै दीपेन्द्र सिंह ऐरीको हातबाट क्याच आउट गराए । नोक क्रोइस १२ रन बनाउँदा रन आउट भए ।

बास डे लिड २७ रन बनाउँदा ललितको बलमा बोल्ड आउट भए । ललितले नै १६औँ ओभरको चौथो बलमा साइब्राण्ड एङगलडेब्रेचलाई २३ रनमा अनिल साहको हातबाट क्याच आउट गराएका थिए । छैटौँ ओभरको अन्तिम बलमा ओपनर म्याक्स ओ डाउन १० रन बनाउँदा रन आउट भए ।

तीव्र गतिका बलर सोमपाल कामीले ओपनर माइकल लेभिटलाई पहिलो ओभरको तेस्रो बलमा शुन्य रनमा देव खनालको हातबाट क्याच आउट गराए । नेदरल्याण्ड्सले दिएको १३८ रनको सामान्य लक्ष्य नेपालले १५.२ ओभरमा एक विकेटको क्षतिमा सहजै पूरा गर्यो । नेपालको तर्फबाट ओपनर ब्याटर कुशल भुर्तेल ११ बलमा २८ रनको आक्रमक पाली खेल्दै आउट भए ।

तेस्रो विकेटका लागि आशिफ शेख र अनिल शाहले ११३ रनको अविजित साझेदारी गरेपछि नेपालले सानदार जित हात पारेको हो । आशिफ ५४ र अनिल ५७ रनमा नटआउट रहे । ४५ बलको सामना गरेका आशिफले ८ चौका र एक छक्का प्रहार गरे । अनिलले ३६ बलमा ६ चौका र ४ छक्का हाने ।

अनिलले १३औँ ओभरको चौथो बलमा अर्धशतक पूरा गरे । अनिलले २९ बलमा ६ चौका र ४ छक्का हान्दै अर्धशतक पूरा गरेका हुन् । एक दिवसीय खेलमा अनिल साहको यो दोस्रो अर्धशतक हो। यसअघि उनले घरेलु मैदानमा नै भएको क्यानडाविरुद्धको तीन खेलको सिरिजमा अर्धशतक हानेका थिए।

आशिफले १४.४ ओभरमा अर्धशतक पूरा गरे । ४३ बलमा ७ चौका र १ छक्का हान्दै आशिफले अर्धशतक पूरा गरेका हुन् । ओडीआईमा आशिफको यो १२ औँ अर्धशतक हो । अलराउण्ड प्रर्दशन गरेका ओपनर कुशल भुर्तेल २८ रन बनाउँदा क्याच आउट हुन पुगे ।

कुशल तेस्रो ओभरको पाँचौं बलमा भिभियन किंग्माको बलमा क्याच आउट हुन पुगे । कुशलले ११ बलमा ३ छक्का र २ चौका हाने । नेपालले पहिलो खेल नामिबियासँग गुमाएको थियो । नेदरल्याण्ड्सलाई हराउँदै नेपालले लिग २को तालिकामा २ अंकको खाता खोलेको छ । नेपालले अब आगामी बुधबार तेस्रो खेल नामिबियासँग खेल्ने छ ।