सिरहा । सिरहाको लक्ष्मीपुर पतारी गाउँपालिकामा विकास निर्माणका कामले गति लिएको छ। स्थानी कपिल साहका अनुसार, गाउँपालिका अध्यक्षको विशेष सक्रियतामा लामो समयदेखि जीर्ण रहेको रामपुर गाउँ जाने बाटो पक्की (ढलान) भएसँगै स्थानीयमा खुसियाली छाएको छ।

“पहिला यो बाटोमा हिँड्न धेरै गाह्रो थियो, हिलो र धुलोले सास्ती हुन्थ्यो,” स्थानीय मनोज मण्डलले भने, “तर गाउँपालिका अध्यक्षज्यू र उपाध्यक्षको पहलमा आज हाम्रो गाउँको बाटो चिल्लो र पक्की बनेको छ। अब हामीलाई आवतजावतमा धेरै सहज भएको छ।”

स्थानीय मनोज मण्डलका अनुसार, अध्यक्ष , उपाध्यक्ष , प्रमुख प्रशासकिय अधिकृत र इन्जिनियरहरुको निरन्तरको अनुगमन र सक्रियताका कारण नै यो काम सम्भव भएको हो। विकास निर्माणका काम धमाधम भइरहेको र गाउँको मुहार फेरिँदै गएकोमा उनीहरुले गाउँपालिका नेतृत्वलाई धन्यवाद दिएका छन्।

पछिल्लो समय लक्ष्मीपुर पतारी गाउँपालिकाले सडक निर्माण तथा स्तरोन्नतिलाई प्राथमिकतामा राखेको देखिन्छ। रामपुर गाउँको यो सडक ढलान कार्य समग्र गाउँपालिकामा भइरहेका विकास प्रयासहरुको एक उदाहरण हो। केही समयअघि मात्र गाउँपालिकाले विभिन्न वडाहरु जोड्ने अन्य सडकहरुको पनि स्तरोन्नति र ढलान गर्ने योजना अघि सारेको थियो।

गाउँपालिका कार्यालयका अनुसार, कृषि, शिक्षा, स्वास्थ्य र पूर्वाधार विकासलाई सँगसँगै अगाडि बढाइएको छ। सडक पूर्वाधारलाई विकासको पहिलो आधार मानेर काम अगाडि बढाइएको र क्रमशः सबै वडाहरुका मुख्य सडकहरुलाई पक्की बनाउने लक्ष्य रहेको एक जनप्रतिनिधिले बताए।

रामपुर जाने बाटो पक्की भएसँगै स्थानीय कृषकहरुलाई आफ्नो उत्पादन बजारसम्म पुर्‍याउन सहज हुने, विद्यार्थीहरुलाई विद्यालय जान सजिलो हुने र समग्रमा गाउँको आर्थिक तथा सामाजिक जीवनस्तरमा सुधार आउने अपेक्षा गरिएको छ। “विकास भनेको यही हो, जनताले प्रत्यक्ष महसुस गर्ने खालको,” अर्का एक स्थानीयले थपे, “हाम्रो गाउँपालिकामा अहिले त्यस्तै भइरहेको छ।”